काठमाडौं । अमेरिकाको सेन्टर फर डिजिज कन्ट्रोल एण्ड प्रिभेन्सन (सिडिसी) ले कोरोना भाइरसको संक्रमण वायुको माध्यमबाट पनि सर्ने सम्भावना रहेको बताएको छ। सिडिसीले शुक्रबार जारी गरेको कोरोना भाइरस सम्बन्धी सार्वजनिक निर्देशिकामा संक्रमण सास फेर्ने क्रममा वायुको माध्यमबाट पनि हुन सक्ने उल्लेख छ।

सास फेर्ने हावामा रहेका कोरोना भाइरसयुक्त ओसिला कणहरुका कारण संक्रमण फैलिन सक्ने सम्भावना रहेकाले सावधानी अपनाउन उल्लेख गरिएको छ।
भाइरसलाई छोएको हात वा कोरोना भाइरसयुक्त ओसिला कण मुख, नाक र आँखाको सम्पर्कमा आएमा संक्रमण हुन सक्ने सिडिसीले जनाएको छ। वायुको मार्फत पनि सर्ने भाइरसहरु संक्रमित व्यक्तिबाट ६ फिटको दूरीमा रहे पनि आफ्नो शरीरमा आउन सक्ने चेतावनी सिडिसीले दिएको छ।

यसअघि सिडिसीले कोरोना भाइरसको संक्रमण अधिकांश समयमा संक्रमितको सम्पर्कमा आएपछि मात्रै हुने उल्लेख थियो। सिडिसीले यसअघिसम्म कोरोना भाइरस वायुको माध्यमबाट नसर्ने बताउँदै आएको थियो। संक्रामक रोग विज्ञहरुले भने यसअघि देखि नै कोरोना भाइरस अति साना हावामा हुने कणहरुबाट पनि सर्न सक्ने भन्दै सिडिसी तथा विश्व स्वास्थ्य संगठन (डब्लुएचओ) लाई सचेत पार्दै आएका थिए। सिडिसीको नयाँ निर्देशिकाको वैज्ञानिकहरुले स्वागत गरेका छन्।